Tag: vaali

தமிழ்த்திரை உலகில் கவியரசர் என்றாலே நம் நினைவுக்கு வருபவர் கண்ணதாசன்தான். அவருடைய பாடல்கள் அத்தனையும் தேன் சிந்தும் ரகங்கள். அவருக்கு இணையாக ஒரு காலகட்டத்தில் வளர்ந்து வந்தவர் கவிஞர் வாலி. இவரை வாலிபக் கவிஞர் என்று அழைத்தனர். அந்த அளவு பல தலைமுறைகளாக இளம் ரசிகர்களுக்கும் பிடிக்கும் வகையில் காதல் ரசம் சொட்டும் பாடல்களை எழுதித் தள்ளினார்.

அந்த வகையில் ஒரு விஷயத்தில் கண்ணதாசனை விட வாலி ஒரு படி மேல் போய்விட்டார் என்றே சொல்லலாம். மாடர்ன் தியேட்டர்ஸ் நிறுவனம் அந்தக்காலத்தில் ரொம்பவே பிரபலமானது. அந்த நிறுவனத்தின் படங்கள் என்றாலே அதில் ஒரு தனித்தன்மை இருக்கும். படமும் ஹிட்டாகும்.

கண்ணதாசனுக்கு மாடர்ன் தியேட்டர்ஸ் அதிபர் சுந்தரத்துக்கும் நல்ல நட்பு உண்டு. அதனால் அவர்கள் தயாரிக்கும் படத்துக்கு சம்பளம் குறித்து எதுவும் பேசமாட்டாராம். அவர்கள் தருவதை வாங்கிக் கொள்வாராம். அதே நேரம் வாலியிடம் ஒரு சமயம் அந்த நிறுவனத்திடமிருந்து 1964ல் பாடல் எழுத அழைப்பு வந்ததாம்.

அப்போது அந்த நிறுவனம் கொடுக்கும் சம்பளம் வாலிக்கு குறைவாக இருக்கவே அவர் மறுத்து விட்டாராம். சம்பளம் இவ்வளவு தந்தால்தான் பாடல் எழுதுவேன் என கோரிக்கை வைத்துள்ளார் வாலி. அதைக் கேட்டதும் மாடர்ன் தியேட்டர்ஸ் நிறுவனம் அவரைப் போகச் சொல்லுங்கள் என்று திருப்பி அனுப்பி வைத்து விட்டார்களாம்.

அதன்பிறகு சென்னை திரும்பிய வாலிக்கு மீண்டும் ஒரு வாரம் கழித்து அதே நிறுவனத்திடம் இருந்து அழைப்பு வந்ததாம். அப்போது அவரைத் தொடர்பு கொண்டவர் அர்த்தநாரி. இவர் மாடர்ன் தியேட்டர்ஸ் அதிபர் சுந்தரத்துக்கு வலது கையாக இருந்தவர். இவர் வாலியிடம் நீங்கள் கேட்ட தொகையை தருவதற்கு நிறுவனம் சம்மதித்து விட்டது.

ஆனால் மொத்த பாடல்களையும் எழுதிவிட்டுத் தான் சென்னை திரும்ப வேண்டும். அதுவரை சேலத்தில்தான் தங்கி இருக்க வேண்டும் என்றார். இன்முகத்தோடு அவர் சொன்னதால் வாலி சம்மதித்தார். அதன்பிறகு பாடல் எழுதி முடித்ததும் உங்க பாஸை நான் பார்க்கணும்னு வாலி அர்த்தநாரியிடம் சொன்னாராம்.

அதற்கு ஏற்பாடு செய்ய வாலி சுந்தரத்தைப் பார்த்துள்ளார். அவருடைய தோற்றத்தைப் பார்த்ததும் அவர் மேல் வாலிக்கு ஒரு மரியாதை ஏற்பட்டது. வாலி தன்னோட சம்பள டிமாண்டுக்காக வருத்தப்பட்டாராம். அதற்கு சுந்தரம் பரவாயில்லை என்று சொல்லி இருக்கிறார். தொடர்ந்து அந்த நிறுவனத்தின் 3 படங்களுக்கு பாடல் எழுதும் வாய்ப்பும் வாலிக்குக் கிடைத்துள்ளது.

தமிழ்த்திரை உலகில் சில பாடல்களை வாலி எழுதினாரா, கண்ணதாசன் எழுதினாரா என்றே கண்டுபிடிக்க முடியாது. குழப்பம் வந்துவிடும். அந்த வகையில் எனக்கு அப்புறம் வாலி தான் என்றும் சொன்னார் கண்ணதாசன். நான் இறந்ததும் எனக்கு இரங்கல் கவிதை வாலிதான் எழுத வேண்டும் என்றும் பெருமையாகச் சொல்லி இருக்கிறார் கண்ணதாசன். அதே நேரம் வாலியை வறுத்தெடுக்கும் வகையில் பாடல் ஒன்றையும் எழுதியுள்ளார். என்னன்னு பார்க்கலாமா…

கண்ணதாசனைப் பொறுத்தவரை அனுபவம், இலக்கியம், எளிமை என்ற மூணும் கலந்த கலவைதான். ஒரு பாடல் முழுக்க முழுக்க வாலியை வறுத்து எடுத்துவிட்டாராம் கண்ணதாசன். இதை பேராசிரியர் சண்முகசுந்தரம் சொல்கிறார். எங்க பாப்பான்னு ஒரு படம். அதுல வர்ற பாட்டுக்கு எம்எஸ்வி. இசை அமைத்துள்ளார்.

இந்தப் பாட்டுல என்ன சூழல் என்றால் போலி கவிஞர்கள் வர்றாங்க. அவங்களை அடிச்சி உதைக்கிறாரு ரவிச்சந்திரன். நான்தான்யா ஒரிஜினல்னு பாடி சண்டையும் போடுறாரு. இந்தப் பாடலை டிஎம்எஸ் அருமையாகப் பாடியுள்ளார். நான் போட்டால் தெரியும் போடு. தமிழ் பாட்டால் அடிப்பேன் ஓடு என்று தான் பாடலே ஆரம்பிக்கிறது.

அதே பாடலில் இந்தக் கவிதையைக் குறை சொல்வோரைக் கழியால் அடிப்பேன் வாடா. ‘நீ கம்பனைப் படித்தவனாடா… அட காகிதம் தின்னும் மூடா…’ அப்படின்னு ரொம்ப அழகா பாட்டைப் போட்டுருப்பாரு. அதிலும் முதல் சரணத்தில், ‘அம்மென்னும் முன்னே ஆயிரம் பாட்டை அள்ளி அள்ளி வீசட்டுமா, அப்போதும் உனக்கு புரியாதிருந்தால் சொல்லி சொல்லி உதைக்கட்டுமா’ என்றும் பாடியிருப்பார்.

‘வல்லினம், மெல்லினம் நல்ல இடையினம் என்னும் கம்பை எடுத்து வெண்பா விருத்தம் என்னும் விதவிதமாக சொல்லை எடுத்து நான் போட்டால் தெரியும் போடு. தமிழ் பாட்டால் அடிப்பேன் ஓடு’ என்று கவியரசர் கண்ணதாசன் வரிகளைப் போட்டுள்ளார்.

அதுக்கு அப்புறம் எனக்கு வட்டார மொழியிலும் பாட்டு எழுத முடியும் என்று சொல்லி இருப்பார். ‘பட்டணத்து தமிழில் நைனா என்றால் அர்த்தம் என்ன கூறட்டுமா’ என்று போட்டு இருப்பார்.

‘பயில்வான் மொழியில் வஸ்தாத் என்றால் பொருள் என்ன காட்டட்டுமா? எதுகை மோனை உன் இடவலமாகக் கொடுக்கட்டுமா? அப்படின்னா என்ன உன் ரெண்டு பக்கமும் கோடு மாதிரி வரி வரியாகப் போடட்டுமா’ன்னு கேட்டுருப்பாரு.

எனக்கு இணையா வேறு யாரும் இருக்காங்களாங்கற மாதிரி இறுமாப்புடன் பாடல் எழுதியிருப்பாரு. இந்தப் பாட்டுல வாலியைத் தான் குறை சொல்லி இருக்கறதா சொல்றாங்க. அப்படி சொன்னா கூட அதுல இவ்ளோ தமிழ் இலக்கணங்களை வச்சி எழுதணும்னா அது கவியரசர் கண்ணதாசனால மட்டும் தான் முடியும். மேற்கண்ட தகவலை பிரபல திரை ஆய்வாளர் ஆலங்குடி வெள்ளைச்சாமி தெரிவித்துள்ளார்.