Category: throwback

சந்திரபாபுவுக்கும், எம்ஜிஆருக்கும் இருந்த கருத்து மோதலுக்கு முடிவு கட்டியது யாரு? வாங்க பிரபல தயாரிப்பாளர் சித்ரா லட்சுமணன் என்ன சொல்றாருன்னு பார்ப்போம். 

சந்திரபாபுவுக்கு அதிகமாக திரைப்பட வாய்ப்புகள் இல்லாத சமயத்துல டிஆர்.ராமண்ணாக்கிட்ட இருந்து அவருக்கு ஒரு போன் வந்தது. நான் டிஆர்.ராமண்ணா பேசுறேன். அடுத்து ஒரு படம் தயாரிக்கலாம்னு இருக்கேன். நீங்க எந்த நேரம் சரியா இருக்கும்னு சொன்னீங்கன்னா நான் வீட்டுக்கு வந்து கதை சொல்றேன் என்றார் டிஆர்.ராமண்ணா. உங்ககிட்ட போய் நான் கதை கேட்பேனா? உங்க கம்பெனியைப் பொருத்தவரைக்கும் கதையும் கேட்க மாட்டேன். படத்துல நடிக்கிறதுக்கு எவ்வளவு சம்பளம் கொடுப்பீங்கன்னும் நான் கேட்க மாட்டேன். நிச்சயமா நான் நடிக்கிறேன் என்றார் சந்திரபாபு.

அது சரி யார் ஹீரோன்னு கேட்க, எம்ஜிஆர் தான் ஹீரோவா நடிக்கிறாருன்னு சொன்னார் டிஆர்.ராமண்ணா. அந்த ஆளுக்கிட்டன்னு சந்திரபாபு ஆரம்பிக்க, அதெல்லாம் நான் பார்த்துக்கறேன் விடுங்கன்னு சொன்னார் டிஆர்.ராமண்ணா. சரி. இந்தப் படத்துல நடிக்க எவ்வளவு சம்பளம் கொடுப்பீங்கன்னு கேட்டார் சந்திரபாபு. எதிர்பார்க்காத ஒரு தொகையை சொன்னார் டிஆர்.ராமண்ணா. சந்திரபாபு ஒரு 50 ஆயிரம் ரூபாய் கேட்கலாம்ன இருந்தாரு. ஆனா ஒரு லட்ச ரூபாய் சொன்னார் டிஆர்.ராமண்ணா. அதுக்குப் பின்னால சந்திரபாபு நடிக்க என்ன தயக்கம்? படத்தை ஒப்புக்கொண்டார். அதன் பெயர் பறக்கும் பாவை. 

படப்பிடிப்பு நடைபெற்றுக் கொண்டு இருந்தபோது எம்ஜிஆரின் உதவியாளர் சந்திரபாபு பக்கத்துல வந்து ஐயா உங்களைப் பார்க்கணும்னு சொல்றாரு என்றார். ஐயா என்னைப் பார்க்கணும்னா ஐயா தான் இங்கே வரணுமே தவிர நான் போய் அவரைப் பார்க்க முடியாது என்று சந்திரபாபுவிடம் இருந்து பதில் வந்தது. அவர் இப்படி பதில் சொன்ன உடனே, அந்த நபருக்கு என்ன பண்றதுன்னே புரியல. இதைப் போய் எப்படி எம்ஜிஆர்க்கிட்ட சொல்றது? மெல்ல தயங்கி தயங்கி அந்த நபர் எம்ஜிஆரிடம் இந்த விஷயத்தைச் சொன்னார். அடுத்த 10வது நிமிஷம் எம்ஜிஆர் புறப்பட்டு வந்தார். எம்ஜிஆர் வந்த உடனே தான் உட்கார்ந்து இருந்த நாற்காலியை விட்டு எழுந்திருக்கக்கூட இல்லை சந்திரபாபு. நீங்க என் மேல ரொம்ப கோபமா இருக்கீங்கன்னு தெரியுது. உங்ககிட்ட சில விஷயங்கள் கேட்குறேன். அதுக்கு மட்டும் பதில் சொல்லுங்க.

உங்க படத்துல நடிக்க வாய்ப்பு கொடுங்கன்னு எந்தக் காலகட்டத்துலயாவது நான் கேட்டுருக்கேனா? உங்க கஷ்டத்துக்கு எல்லாம் காரணமான தயாரிக்கும் பொறுப்பு நீங்களே எடுத்த முடிவு. அது நான் சொல்லி செஞ்சதா? இல்ல நீங்களா எடுத்த முடிவா? கடுமையான வட்டிக்கு உங்க சொத்தெல்லாம் அடமானம் வச்சி கடன் வாங்க சொன்னது நானா? படம் எடுக்கணும்னு என்னை சந்திச்சி நீங்க பேசிய போது, என்னை வச்சிப் படம் எடுக்கணும்னா கொஞ்சம் பொறுமையா இருக்கணும். நிச்சயமா காலதாமதம் ஆகும்னு நான் உங்ககிட்ட சத்தியம் வாங்கிட்டேனா, இல்லையா? என்னுடைய எத்தனை படங்களின் படப்பிடிப்பு நின்னு போயிருக்கு? ஏன் என்னுடையதே கூட ஒரு சில படங்கள் நின்னுபோயிருக்கு. அதெல்லாம் உங்களுக்குத் தெரியாதா?

உங்களுக்கும் எனக்கும் நடுவுல எத்தனை பேரு இருக்காங்க? அவங்கள்ல யாராவது நம்மை ரெண்டு பேருக்கும் உள்ள இந்தக் கருத்து வேறுபாடை நீக்குறதுக்கு ஏதாவது முயற்சி பண்ணினாங்களா? நீங்க ஆத்திரத்துல என்னைப் பத்தி தப்பு தப்பா பத்திரிகைக்காரங்ககிட்ட பேசுன மாதிரி என்னைக்காவது நான் உங்களைப் பத்திப் பேசிருக்கேனா? இது எல்லாத்துக்கும் மேல நான் என்ன தான் உங்களை ஆத்திரப்படுத்தி இருந்தாலும் நான் தகப்பனா மதிக்கிற எங்க அண்ணனை நாற்காலியா தூக்கி நீங்க அடிக்கப் போனீங்களே? அது சரிதானா? உங்க அப்பாவை நான் இப்படி அடிக்கப் போயிருந்தா நீங்க மன்னிப்பீங்களா? நாடோடி மன்னன் வெற்றி விழாவுல நான் என்ன பேசுனேன்? சந்திரபாபு ஒரு மாபெரும் கலைஞன்னு பேசுனேன். அதே எண்ணத்துலதான் இன்னிக்கும் இருக்கேன்.

அதனாலதான் நாம ரெண்டு பேரும் இந்தப் படத்துல சேர்ந்து நடிக்கிறோம். கிறிஸ்துமஸ் அன்னைக்கு உங்களுக்கு ஒரு கேக்கும், பணமும் வந்ததே. அது யாரு அனுப்பிச்சிருப்பாங்கன்னு பல மணி நேரம் நீங்க குழம்பி இருப்பீங்க. அந்த ரெண்டையும் கொடுத்து அனுப்பிச்சது நான் தான். இந்த பறக்கும் பாவை படத்துல நீங்க நடிக்கிறீங்கன்னா அதுக்கு காரணமும் நான் தான். இந்தப் படத்துல உங்களை ஒப்பந்தம் பண்ணச் சொல்லி நான் தான் டிஆர்.ராமண்ணாகிட்ட சொன்னேன். அவங்க உங்களுக்குச் சொன்ன லட்ச ரூபாய் சம்பளத் தொகையும்… நான் சொல்லி அவர் சொன்னது தான்.

உங்க வேதத்துல ஒரு கன்னத்துல அடிச்சா மறு கன்னத்தையும் காட்டுன்னு ஒரு வரி வரும். நான் மறுகன்னத்தைக் காட்டல. அதுக்குப் பதிலா கிறிஸ்துமஸ் கேக்கை உங்களுக்கு அனுப்பி வெச்சேன். பாபு சார் நீங்க நல்ல மனுஷன். நல்ல கலைஞன். இன்னும் மாபெரும் கலைஞனா வரணும். இன்னும் பெரிய மனுஷனா வளரணும்னு நான் ஆசைப்படுறேன்னு எம்ஜிஆர் சொன்ன போது சந்திரபாபு கண்களில் இருந்து கண்ணீர் கசிந்தது. மிக நீண்ட இடைவெளிக்குப் பின்னால, சந்திரபாபு கண்கள்ல இருந்து ஒரு சொட்டுக் கண்ணீர் வந்ததுன்னா அது அன்னைக்குத்தான் என்கிறார் சித்ரா லட்சுமணன்.    

எல்லோருடைய வாழ்க்கையிலும் இரவும் வரும். பகலும் வரும். ஆனா சந்திரபாபு வாழ்க்கையில் மட்டும் அவரது சில நடவடிக்கைகள் காரணமாக ஒரு காலகட்டத்தில் அவரது வாழ்க்கையே இருண்டு போய் இருந்தது. அப்படிப்பட்ட சூழ்நிலையில தான் அந்த ஆண்டு கிறிஸ்துமஸ் வந்தது. கிறிஸ்துமஸ் கொண்டாட கேக் வாங்கவோ, புதுத்துணி வாங்கவோ சந்திரபாபு கையில காலணா இல்லை. அப்படிப்பட்ட நேரத்துல அவரது வீட்டுக்கதவு தட்டப்பட்டது.

சந்திரபாபு தம்பி கதவைத் திறந்தபோது வெளியில் நின்றிருந்த நபர் ஒரு பெரிய பாக்ஸை அவர் கையில் கொடுத்தார். இதை ஐயா உங்கக்கிட்ட கொடுத்துட்டு வரச் சொன்னார்னு சொல்லிவிட்டு அவர் கிடுகிடுவென போய்விட்டார். யார் அந்த ஐயான்னு சந்திரபாபு பார்க்குறதுக்குள்ள அவர் காரில் ஏறிப் பறந்து விட்;டார். சந்திரபாபு தம்பி ஜவஹர் அந்த பாக்ஸை அண்ணன் கையில் கொடுத்த போது பிரிச்சிப் பாருன்னு சொன்னார். அந்தப் பாக்ஸை பிரித்தார்.

அதில் மிகப்பெரிய ஸ்பென்சர் கேக் இருந்தது. கூடவே ஒரு கவர். அதுக்குள்ள 5000 ரூபாய் பணம். யாரு அந்தப் பரிசை அனுப்பிச்சிருப்பாங்கன்னுனு சந்திரபாபு யோசித்தார். நெருங்கிய நண்பன் யாராவது தான் நம்மோட கஷ்டத்தை தெரிஞ்சிக்கிட்டு அனுப்பிருப்பான்னு நினைக்காரு. ஜெமினிகணேசன், சாவித்ரி, இல்லன்னா ஏஎல்.சீனிவாசன்னு பல பெயர்கள் அவரது மனதில் வந்து வந்து போனது. ஆனால் உண்மையிலேயே அவருக்கு யார் பணத்தை அனுப்பி வச்சாரோ அவரது பெயர் மட்டும் சந்திரபாபுவின் மனதில் வரவே இல்லை.

அதுக்குக் காரணம் சந்திரபாபுவுக்கும், அவருக்கும் அந்தக் காலகட்டத்துல இருந்த மனக்கசப்பு. சந்திரபாபு பிரச்சனையில இருக்காருன்னு தெரிந்து கொண்டு அவருக்கு அந்தப் பரிசை அனுப்பி வைத்தவர் மக்கள் திலகம் எம்ஜிஆர். கேக் அனுப்பியது மட்டுமல்ல. அதுக்குப் பின்னாலும் பல உதவிகளைச் சந்திரபாபுவுக்காக செய்தவர் தான் புரட்சித்தலைவர் எம்ஜிஆர். 

புதுமை இயக்குனர் ஸ்ரீதர் இயக்கத்தில் கமல், அம்பிகா நடித்த படம் நானும் ஒரு தொழிலாளி. இந்தப் பெயரை முதலில் ஸ்ரீதர் சூட்டி இருந்தது எம்ஜிஆரும், அவரும் இணைந்த ஒரு படத்திற்காக. உரிமைக்குரல் படத்தின் வெற்றியைத் தொடர்ந்து எம்ஜிஆர் நடிக்க, ஸ்ரீதர் இயக்கத்தில் ஒரு படம் வெளியானது. அந்தப்படத்தின் படப்பிடிப்பு கூட 2, 3 நாள்கள் நடைபெற்றது.

அந்தப் படத்தின் பெயர் தான் நானும் ஒரு தொழிலாளி. 2 நாள்கள் படப்பிடிப்பு நடத்திய பிறகு அந்தப் படத்தின் கதை அமைப்பு சரியாக வரும் என்கிற எண்ணம் ஸ்ரீதருக்கு வரல. அதனால எம்ஜிஆரை சந்தித்த அவர், இந்தப் படத்தின் கதையை நான் யோசித்து யோசித்துப் பார்த்தேன். சரியா வரும்னு எனக்குத் தோணல. அதனால இப்போதைக்கு இந்தப் படத்தின் படப்பிடிப்பை நிறுத்திடலாமா என்று எம்ஜிஆரிடம் கேட்டார் ஸ்ரீதர்.

ஒரு படைப்பாளியான உங்களுக்கே அந்தப் படத்தின் கதை சரியாக அமையாதுன்னு தோணுறபோது அந்தப் படத்தின் படப்பிடிப்பை நடத்துறதுல என்ன லாபம் இருக்கு? நீங்க நல்லதா ஒரு கதையை ரெடி பண்ணுங்க. அதுக்குப் பின்னால நாம ஆரம்பிச்சிடலாம்னு எம்ஜிஆர் சொல்லி விட்டார். இதற்கு இடையில ஸ்ரீதர் ஒரு கன்னடப் படத்தை இயக்கப் போய் விட்டதால, நானும் ஒரு தொழிலாளி படம் அப்படியே டிராப் ஆனது. அந்தப் பெயரைத் தான் பின்னாடி கமல்ஹாசனை வைத்து எடுத்த படத்துக்கு வைத்தார் ஸ்ரீதர். 

பல ஆண்டுகளுக்கு முன் நடைபெற்ற ஒரு நிகழ்ச்சி. அது கமல், சிவாஜி இருவருக்குமான ஒரு அரிய உரையாடல். தற்போது வைரலாகப் பரவி வருகிறது இந்த வீடியோ. இதுல கமல், சிவாஜியிடம் ஒரு கேள்வி கேட்கிறார். 1954க்குப் பிறகு நடிக்கிற எல்லா நடிகர்களுக்கும் உங்களோட பாதிப்பு இருக்கு. எனக்கும் அது முக்கியமா இருக்கு. எனக்கு அந்தக்காலத்துல நீங்க பண்ணியிருந்த சில விஷயங்களைப் பார்க்கும்போது வயித்தெரிச்சலா இருக்கும். உங்களுக்கு இன்ஸ்பிரேஷன் யாரு? எனக்கு அது போட்டு உறுத்திக்கிட்டே இருக்கும்.

யாருமே ஒரிஜினல் கிடையாது. அம்மான்னு சொல்றதுகூட சொல்லிக் கொடுத்துத்தான் சொல்றோம்னு கமல் கேள்வி கேட்க, அதற்கு சிவாஜி சொன்ன பதில் இதுதான். நான் சின்னபிள்ளையில இருந்து அநேகமா ஆங்கிலப்படம் பார்க்குறது உண்டு. மிடாசாலின்டினோ பண்ணின சைலன்ட் மூவில ஹீக்குன்னு ஒரு படம் ஆக்ட் பண்ணிருக்காரு. அதுதான் அவர் பண்ணின டாக்கி பிக்சர். அதுல இருந்து எவ்ளோ படங்கள் பார்த்துக்கிட்டு வாரேன். மற்ற நடிப்புல இருந்து நம்ம நடிப்பு தனிப்பட்ட முறையில இருக்கணும்னு சின்னப்பிள்ளையில இருந்து ட்ரை பண்ணிக்கிட்டு இருக்குறதால ஒருவேளை சக்சஸ் பண்ண முடியுதோ, என்னமோன்னு பதில் சொல்கிறார்.

அப்பவும் கமல் முடிஞ்சுதோ, என்னமோன்னு பணிவா சொல்றீங்க. முடிஞ்சிருக்கு என்று முத்தாய்ப்பாக புள்ளி வைக்கிறார். நாங்க கொஞ்சம் ஒரு மாதிரி நடந்தா சிவாஜி மாதிரி நடக்குறீங்க. உங்களுக்குன்னு ஒரு ஸ்டைல் இல்லையான்னு கேட்கிறாங்க. திருவிளையாடல் படத்துல ஒரு மாதிரியா நடக்குறீங்க. புருவத்தைத் தூக்குனா சிவாஜி மாதிரி வருதுங்குறாங்க. இதெல்லாம் எங்கே இருந்து புடிச்சீங்கன்னு கமல் கேட்கிறார். அதற்கு சிவாஜி சொன்ன பதில் இது. இதெல்லாம் ட்ரை பண்ணி நாமளே தெரிஞ்சிக்கறதுதான். மத்தவங்க சொல்லிக் கொடுத்து வர்றது இல்லை.

நடிப்புங்கறது வேற. கல்லூரி வைக்கலாம். சொல்லிக் கொடுக்கலாம். ஆனா நம்மக்கிட்ட இருந்து வர்றது இருக்கே. நம்ம அடிவயித்துல இருந்து வர்ற எக்ஸ்பிரஷன் இதெல்லாம். அதெல்லாம் நாமளே தான் பிராக்டிஸ் பண்ணணுமோ ஒழிய, யாரும் சொல்லிக் கொடுத்து வர்றது இல்லை. என்ன கேரக்டர்னு நாம தெரிஞ்சிக்கிட்டா, அது சக்சஸ் ஆகப் போகுது. ஜஸ்ட் லைக் தேட்னு சொல்லவும், உங்களுக்கு ஜஸ்ட் லைக் தேட். அங்கே செட்ல பல பேரு முக்கிக்கிட்டு இருக்காங்க. அதுல நானும் ஒருவன்னு கமல் சொல்கிறார். 

பாட்ஷா, ஆஹா வெற்றிப்படங்களை தொடர்ந்து சுரேஷ் கிருஷ்ணா இயக்கத்தில் வெளிவந்த படம் சங்கமம். ரகுமான் நாயகனாக நடித்த அந்த படத்தில் விந்தியா நாயகியாக அறிமுகம் ஆகி இருந்தார். மணிவண்ணன், விஜயகுமார், வடிவேலு, டெல்லிகணேஷ் உள்ளிட்ட ஏராளமான நட்சத்திரங்கள் இப்படத்தில் நடித்திருந்தனர். அந்த கால கட்டத்தில் முன்னணி தயாரிப்பு நிறுவனமாக இருந்த பிரமிட் பிலிம்ஸ் சார்பில் வி. நடராஜன் இப்படத்தை தயாரித்திருந்தார்.

இப்படத்தின் மிகப்பெரிஅய் தூண் ஏ.ஆர்.ரகுமான் இசை என்பது குறிப்பிடத்தக்கது.பாடல்கள் அனைத்தும் மிகப்பெரிய வெற்றியை பெற்றது. மழைத்துளி மழைத்துளி, வராக நதிக்கரை ஓரம், சௌக்கியமா கண்ணே, முதல் முறை கிள்ளிப் பார்த்தேன், மார்கழி திங்கள் அல்லவா மற்றும் ஆலால கண்டா போன்ற அனைத்து பாடல்களும் இன்றும் இளைஞர்களால் கொண்டாடப்படுகிறது.

சங்கம வெளியானபோது இப்படம் தில்லானா மோகனாம்பாளின் வெர்சன் என்று பலரும் கூறினார்கள். மிகப்பெரிய எதிர்பார்ப்பில்  வெளியான இப்படம் ரசிகர்களை ஏனோ பெரிதாக கவரவில்லை. சுமாரான வெற்றியையே பெற்றது.

கடந்த 1999ம் ஆண்டு ஜூலை 16ம் தேதி வெளியான சங்கமம் இன்றுடன் 27 ஆண்டுகளை நிறைவு செய்துள்ளது.